Phili 1 | PONPDN | STEP | PAULUS o Timoteus ladun Iesus Kristus on me saraui kan karos en Kristus Iesus o pisop o saunkoa kan nan Pilipi.

Philippians 1

1 PAULUS o Timoteus ladun Iesus Kristus on me saraui kan karos en Kristus Iesus o pisop o saunkoa kan nan Pilipi. 2 Mak o popol san ren Kot Sam atail o Kaun Iesus Kristus en mi re omail! 3 I kin danke ai Kot ni ai tamatamanda komail. 4 I me i kin wiada ni ai kapakap kin komail ansau karos, o i kin kapakap ni pereperen. 5 Pweki omail dadaurata ronamau san ni tapi o kokodo lel met. 6 O i kamelele me I, me tapidar wiawia mau on eu re omail pil pan kanikiela lan lel ran en lesui Krutul. 7 Me pun i en kamelele mepukat duen komail karos, pwe i kin kolekol komail nan monion i ni ai salidi wet, wasa i kin kaweweda o kadededa ronamau; a komail karos kin ian ia kapwaiada mak wet. 8 Pwe Kot ai saunkadede, duen i kin loleiteki komail pan kupur en Kristus Iesus. 9 O me i pil kapakapaki pwe omail limpok en lapalapala kakairida ni lolekon o lamalam akan. 10 Pwe komail en kasauiada, da me mau san karos, pwe komail en melel o pun lao lel ran en Kristus. 11 O direki wan pun kan, me kin wiaui ren Iesus Kristus men kalinanada o kapina Kot. 12 Ri ai kan, i men, komail en asa ir ai, me dialan kaindindar ronamau, 13 Nan i ai salidi kan pweki Kristus, me pwarapwaradar nan im en monsap o wasa karos. 14 O ri atail toto pan kupur en Kaun, me ainar kidar ai salidi kan, ap aima san mas o, en padaki mas an en Kot ap so masak. 15 A akai kin padaki duen Kristus akpeirin, o akamai, o akai san nan ar inon mau. 16 A met akan ni limpok, pwe re asa, me nai salidier, pwen kadede pan ronamau. 17 Irail kin padaki duen Kristus kapei lokaia o so melel, re kiki on, me re pan kalaudela ai salidi kan; 18 A pil menda? Pwe Kristus kin lolok sili ni son karos, ma ni akamai de ni melel, i me i peren kida, ei i pan pereperen. 19 Pwe i asa, mepukat pan kare on ia maur soutuk ki omail kapakap o sauas pan Nen en Iesus Kristus. 20 Duen ai inon ion, o auiaui, o kaporoporeki, me i sota pan namenokala ni eu son. A duen mas o, iduen ansau wet Kristus en kapinan laud ni war ai, ma ni ai pan memaurata de mela. 21 Pwe Kristus, i maur i, o mela ai pai. 22 A ma i pan memaurata ni pali uduk, ai wiawia kan pan kadepa; ari i ap sasa, da me i en pilada. 23 Pwe i mauki ira karos: I inon ion mela, pwen mila ren Kristus, pwe i eta me mau. 24 A ai mimieta ni pali uduk me mau son pweki komail. 25 Ari, i ap asa, me i pan mimieta re omail karos, pwen sauasa omail peren o poson, 26 Pwe omail kapin en lapalapala ren Kristus Iesus ki ai pwaralan komail. 27 Ari, komail weweid duen me waron ronamau en Kristus, pwe ma i pwaralan komail, de ni ai doo, i en ron, me komail keleki nen ta ieu, o komail lamalam ta pot, i ian kelail dodok on ronamau ki poson. 28 O komail ender waponki, me kin palian komail akan, pwe i kasansale pan arail pan lokidokila, a omail pan maurela; a mepukat san ren Kot. 29 Pwe a muei on komail er pan kupur en Kristus, kaidin poson eta, pwen pil kalokolokeki i, 30 Pwe komail kin wia pei ota, me komail kilaner re i, o me komail kin ron duen nai.